លោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុក៏ត្រូវពិនិត្យមើលទង្វើមិនប្រក្រតីរបស់លោក យ៉ឹង សំអន ជាបន្ទាន់ផងដែរ ដើម្បីកុំឲ្យបុគ្គលនេះធ្វើអ្វីៗតាមអំពើចិត្តរបស់ខ្លួនតទៅទៀត។ប្រភពពត៏មានបានឲដឹងថា ក្នុងនាមជាប្រធានស្នាក់ការគយនិងរដ្ឋាករច្រកអន្តរជាតិបាវិតលោក យ៉ឹង សំអន មិនបានរឹតបន្តឹងការប្រមូលពន្ធជូនរដ្ឋឲ្យបានត្រឹមត្រូវនោះទេ ដោយបានបើកដៃឲ្យឈ្មួញនាំចូលទំនិញគេចពន្ធនិងទំនិញខុសច្បាប់តាមរថយន្តធំៗស្រេចតែអំពើចិត្ត ថែមទាំងមានការកែឯកសារបន្លំប្រភេទទំនិញទៀតផង។ ជួនកាលឈ្មួញខិលខូចនាំទំនិញពីប្រទេសយួនចូលស្រុកខ្មែរ ប៉ុន្តែលោក យ៉ឹង សំអន អះអាងថាឈ្មួញនាំទំនិញចេញពីផ្សារអន្តរជាតិតាមតំបន់ព្រំដែនតែប៉ុណ្ណោះ។ ជាងនេះទៅទៀតឈ្មួញមួយចំនួនបានដឹកជញ្ជូនទំនិញគេចពន្ធតាមរថយន្តក្រុងដឹកភ្ញៀវទេសចរ ហើយលោក យ៉ឹង សំអន មិនចាត់វិធានការបង្ក្រាបនោះទេ បែរជាបណ្តោយឲ្យបទល្មើសកើតទ្បើងតាមអំពើចិត្ត។
មន្ត្រីគយ ប្រចាំស្នាក់ការគយច្រកអន្តរជាតិបាវិត បានអំពាវនាវឲ្យលោក គុណ ញឹម ដែលជាអគ្គនាយកនៃអគ្គនាយកដ្ឋានគយនិងរដ្ឋាករចាត់វិធានការលើលោក យ៉ឹង សំអន ប្រធានស្នាក់ការគយច្រកអន្តរជាតិបាវិតជាបន្ទាន់។ ដោយហេតុថាមេគយច្រកអន្តរជាតិបាវិតរូបនេះប្រើប្រាស់អំណាចប្រមូលផលប្រយោជន៍ធ្វើមានធ្វើបានស្រេចតែអំពើចិត្តដូចជាបើកដៃឲ្យឈ្មួញនាំចូលទំនិញខុសច្បាប់និងទំនិញគេចពន្ធបណ្តាលឲ្យបាត់បង់ចំណូលពន្ធរដ្ឋយ៉ាងច្រើនសន្ធឹកសន្ធាប់ក្នុងមួយខែៗ។
កន្លងមកលោក យ៉ឹង សំអន ធ្លាប់ឃុបឃិតឲ្យឈ្មួញដឹកជញ្ជូនទំនិញគេចពន្ធមកស្តុកនៅក្បែរស្នាក់ការគយច្រកអន្តរជាតិបាវិត ដូចជាស្រាថ្លៃៗ និងទំនិញជាច្រើនប្រភេទទៀតធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់។ ករណីលោក យ៉ឹង សំអន បើកដៃឲ្យឈ្មួញនាំស្រាថ្លៃៗ និងទំនិញគេចពន្ធមកស្តុកទុកក្បែរស្នាក់ការគយច្រកអន្តរជាតិបាវិតនោះ ធ្លាប់ត្រូវបានសមត្ថកិច្ចគយខេត្តស្វាយរៀង និងនគរបាលប្រឆាំងបទល្មើសសេដ្ឋកិច្ចធ្វើការបង្ក្រាប ហើយតម្រូវឲ្យម្ចាស់ទំនិញបង់ពន្ធរាប់សែនដុល្លារអាមេរិក។ លោក យ៉ឹង សំអន ដែលកាន់តំណែងជាប្រធានស្នាក់ការគយច្រកបាវិតកំពុងប្រព្រឹត្តអំពើពុករលួយធ្វើឲ្យរដ្ឋខាតបង់ចំណូលពន្ធយ៉ាងច្រើន ៕
