ក្នុងឆ្នាំ២០១៣នេះ រាជរដ្ឋាភិបាលកម្ពុជា បានសម្រេចប្រកាសផ្អាកពិធីបុណ្យអុំទូកជាលើកទី៣ទៀតហើយ ក្រោមហេតុផលថាទឹកជំនន់កំពុងគំរាមកំហែង។ សេចក្ដីប្រកាសនេះ កំពុងធ្វើឲ្យតារាភាគច្រើនជជែកវែកញែកច្រើន ពីការជ្រុះបាត់ប្រាក់ចំណូលដែលពួកគេខំរំពឹងទុក។ បុណ្យអុំទូកសម្រាប់ឆ្នាំ២០១៣នេះ ត្រូវចាប់ផ្តើមពីថ្ងៃទី១៦ដល់ថ្ងៃទី១៧ខែវិច្ឆិកា។
មិនត្រឹមតែតារាប្រុសស្រីល្បីឈ្មោះក្នុងពិភពសិល្បៈនោះទេ ពោលគឺសូម្បីតែតារាប្រុសស្រីរាយរង ក៏ប្រឈមនឹងរឿងបាត់ឱកាសដូចគ្នានោះដែរ ពិសេសពាក់ព័ន្ធនឹងផែនការពង្រីកកេរ្តិ៍ឈ្មោះ និងការកើបប្រាក់ពីការច្រៀងរាំ។ បើទោះជាក្នុងកិច្ចសម្ភាសន៍ តារាម្នាក់ៗបាននិយាយថា ពួកគេជាតារាមិនចោទនោះទេ ត្រឹមចូលរួមរំលែកទុក្ខចំពោះជនរងគ្រោះដែលកំពុងលិចលង់ដោយទឹកជំនន់ នាពេលថ្មីៗ។ ប៉ុន្តែនៅពីក្រោយពីការបញ្ជាក់ផ្លូវការនេះ គេឮស្ទើរតែគ្រប់មាត់ថា ពួកគេកំពុងជ្រុះបាត់លុយទៀតហើយ ដោយសារតែការប្រកាសផ្អាកបុណ្យអុំទូកលើកទី៣នេះ។ ក្នុងនោះ គេឮសំឡេងមិនសប្បាយចិត្ត ពីសំណាក់ចម្រៀង តារាសម្ដែង និងតារាបង្ហាញម៉ូដល្បីឈ្មោះច្រើនជាង ដែលភាគច្រើនពួកគេរមែងចេញមុខបណ្ដាក់គ្នាពីវេទិកាប្រគំតន្ត្រីមួយទៅវេទិកាប្រគំតន្ត្រីមួយ ដែលខ្លះម្នាក់ឯង គឺជាប់កម្មវិធី ៥កន្លែងក្នុងមួយយប់ក៏មាន។
ក្នុងវេទិកាថតកម្មវិធីអបអរបុណ្យភ្ជុំរបស់ស្ថានីយទូរទស្សន៍CTN បាយ័ន និងអាស៊ីអាគ្នេយ៍ គេឮស្ទើរតែគ្រប់មាត់ នៅពេលតារាមួយចំនួនលើកឡើងថា តើបុណ្យអុំទូកឆ្នាំនេះ គេធ្វើ ឬមិនធ្វើ តាំងពីមិនទាន់ដឹងថា ពិធីនោះត្រូវសម្រេចផ្អាក។ តារាស្រីល្បីឈ្មោះម្នាក់ ដែលកន្លងមកត្រូវគេឃើញចេញមុខ នៅក្នុងវេទិកាប្រគំតន្ត្រីរបស់ក្រុមហ៊ុនអាឡាំងដឺឡុងផង របស់ស្ថានីយទូរទស្សន៍ បាយ័នផង និង នៅវេទិកាតន្ត្រីផ្សេងផង បានបញ្ជាក់នៅចំពោះមុខក្រុមតារាសិល្បៈគ្នាឯងថា បើបុណ្យអុំទូកឆ្នាំនេះ លុបចោលទៀត រូបនាងពិតជាបោះប្រាក់ចោលរាប់ពាន់ដុល្លារទៀតហើយ។ តារាភាគច្រើនបានចាត់ទុកថា ការប្រកាសលុបចោលពិធីបុណ្យនេះ គឺជារឿងស៊យរបស់ខ្លួន ខណៈដែលតារាទាំងនោះ យល់ថា ក្រៅពីជួយឲ្យពួកគេរកចំណូលបានស្រួលក្នុងរយៈពេល៣ថ្ងៃនោះ វេទិកានោះ ក៏ជួយឲ្យពួកគេកាន់តែសុះសាយប្រជាប្រិយភាពដោយមិនលំបាកផងដែរ។
តាមការកត់សម្គាល់ កម្មវិធីនោះ តារាដែលកាក់កបជាងគេ រួមមានតារាមាស សុខសោភា លោកអ៊ុក ណារីម នាងឆោម ឆពុំ អ្នកនាងម៉េង កែវពេជ្ជតា លោកណុប បាយ៉ារិទ្ធ លោកខេមរៈ សិរីមន្ត លោកព្រាប សុវត្ថិ នាងឱក សុគន្ធកញ្ញា លោកសាពូន មីដាដា អ្នកនាងសឿ សុធារ៉ា កញ្ញា នី មុនីនាថ កញ្ញា សារ៉ាយ សក្ខិណា និងតារាប្រុសស្រីល្បីឈ្មោះផ្សេងទៀត ដោយអ្នកខ្លះចុះពីឆាកមួយឡើងឆាកមួយ ហើយរកចំណូលបានដល់ម៉ឺនដុល្លារត្រឹមរយៈពេលពិធីបុណ្យនេះ ប្រព្រឹត្តឡើងនោះផង។ អញ្ចឹងហើយ ទើបគ្រាន់តែដឹងថា ការប្រកាសលុបផ្លូវការត្រូវបានបញ្ជាក់ច្បាស់ ហាក់ធ្វើឲ្យតារាដែលមានទីផ្សារទាំងនោះ ស្រងាកចិត្ត ពិសេសចំពោះតារាមានទីផ្សារ ហើយបានប្រកាន់ជំហរមិនហ៊ានចេញច្រៀងក្រៅប្រទេស ដើម្បីទទួលការងារថ្ងៃបុណ្យអុំទូក ក្រែងរដ្ឋាភិបាលមិនលុបចោលនោះ។
តារាចម្រៀងម្នាក់ផ្សេងទៀត បានប្រាប់ក្នុងកិច្ចសំណេះសំណាលជជែកលេងជាមួយភ្នាក់ងារសារព័ត៌មាន ដោយសុំមិនបញ្ចេញឈ្មោះនាងថា ការប្រកាសលុបចោលបុណ្យអុំទូក គឺមិនខុសពីបង្ខំឲ្យនាងដុតចោលប្រាក់ដុល្លារចោលនោះទេ ដោយសារតែការទាក់ទងគ្នាកន្លងមក ធ្វើឲ្យនាងមើលឃើញប្រាក់នៅនឹងមុខទៅហើយ។ ត្រឹមអំឡុងខែ៨ និងខែ៩ មានក្រុមហ៊ុនចំនួន៣រួចមកហើយ ទាក់ទងឲ្យនាងចេញច្រៀង ដោយនាងមិនទាន់រាប់បញ្ចូលការទាក់ទងឲ្យច្រៀងនៅលើឆាកតន្ត្រីផ្សេងទៀត នៅអំឡុងកៀកនឹងថ្ងៃប្រារព្វបុណ្យអុំទូកនៅឡើយ។ តារាមិនឲ្យបញ្ចេញឈ្មោះរូបនេះ ប្រាប់ថា បាត់ប្រាក់២ពាន់ដុល្លាររួចទៅហើយ គិតត្រឹមតែការទំនាក់ទំនងដែលបានជជែកគ្នាតែ៣ក្រុមហ៊ុនកន្លងមក។ ទោះយ៉ាងណា ក៏មានសំឡេងពីសំណាក់តារាមួយចំនួន ដែលគាំទ្រឲ្យលុបចោលពិធីបុណ្យអុំទូកសម្រាប់ឆ្នាំនេះផងដែរ បន្ទាប់ពីគ្រោះទឹកជំនន់ដែលកំពុងលិចលង់ បានបំផ្លាញហេដ្ឋារចនាសម្ព័ន្ធជាតិ ផ្ទះសម្បែងប្រជាជន និងអាយុជីវិតប្រជាកសិករខ្មែរគួរឲ្យបារម្ភបែបនេះ។
បញ្ជាក់ថា បុណ្យអុំទូកឆ្នាំ២០១១ ត្រូវប្រកាសលុបចោលដោយសារស្ថានភាពទឹកជំនន់ឡើងខ្លាំង ឆ្នាំ២០១២ត្រូវប្រកាសលុប ដើម្បីចូលរួមកាន់ព្រះរាជមរណទុក្ខព្រះករុណាព្រះមហាវីរក្សត្រ និងឆ្នាំ២០១៣ចុងក្រោយនេះ គឺក្រោមហេតុផលទឹកជំនន់ដូចមុន។ ទោះយ៉ាងណា ការប្រកាសផ្អាកបុណ្យអុំទូកក្នុងឆ្នាំនេះ ត្រូវគេមើលឃើញថា មានជាប់ពាក់ព័ន្ធនឹងគម្រោងមហាបាតុកម្មរបស់គណបក្សប្រឆាំងនាពេលខាងមុខនោះច្រើនជាង បើធៀបនឹងមុនឆ្នាំ២០១១ ដែលកម្ពុជាមានស្ថានភាពគ្រោះទឹកជំនន់ក្នុងកម្រិតនេះដែរ តែនៅប្រារព្ធពិធីបុណ្យអុំទូកជាធម្មតា។
