ខេត្តសៀមរាប៖ រយៈពេលប៉ុន្មានឆ្នាំចុងក្រោយនេះ គេសង្កេតឃើញថា មានមន្ទីរពេទ្យឯកជនជាច្រើនបានបើកព្យាបាលអ្នកជំងឺ នៅក្នុងខេត្តសៀមរាប ក្នុងនោះមានមន្ទីរពេទ្យមួយដែលមានយីហោ មន្ទីរសំរាកព្យាបាល រស្មីអង្គរ (ជីងហ៊ួរ) ដែលតែងតែលេចលឺរឿងអាស្រូវ ដោយព្យាបាលអោយមនុស្សស្លាប់ កន្លងមក ហើយនៅពេលថ្មីៗនេះ សមត្ថកិច្ចបានឆែកឆេរ រកឃើញមានថ្នាំហួសដឺឡេ (ផុតកំណត់ប្រើប្រាស) មួយ ចំនួនធំ និងសេរ៉ូមគេចពន្ធមិនចុះបញ្ជី យ៉ាងសន្ធឹកសន្ធាប់ទៀតផង តែខាងមន្ទីរនិងក្រសួងសុខាភិបាលហាក់នៅតែធ្វើប្រងើយកន្តើយ មិនចាត់ការអោយបានធ្ងន់ធ្ងរ និងមន្ទីរពេទ្យមួយនេះដដែល។
យោងតាមប្រភពព័ត៌មាន បានអោយដឹងថា កាលពីថ្ងៃទី១៥ខែមករាឆ្នាំ២០១៥ កន្លងទៅថ្មីៗនេះ ក្រុមមន្ត្រីជំនាញដូចជាខាង មន្ទីរសុខាភិបាលខេត្ត និងខាងការិយាល័យប្រឆាំង បទល្មើសសេដ្ឋកិច្ចនៃស្នងការដ្ឋានខេត្តបានចុះឆែកឆេរ ក្នុងមន្ទីរពេទ្យរស្មីអង្គរខាងលើ រកឃើញវត្ថុតាងល្មើសច្បាប់ចំនួន០៧មុខ ក្នុងនោះមានថ្នាំគ្រាប់ចំនួន៣០១គ្រាប់ ហួសកាលបរិច្ឆេតប្រើប្រាស និងសេរ៉ូម៨៣ដបមិនបានចុះបញ្ជី។កាលពី ប៉ុន្មានឆ្នាំកន្លងទៅ ប្រភពព័ត៌មានបែកធ្លាយ ចេញពីបុគ្គលិកដែលធ្លាប់បំរើការ នៅក្នុងមន្ទីរពេទ្យ រស្មីអង្គរ នេះបានបង្ហើបប្រាប់ថា វេជ្ជបណ្ឌិតជាជនជាតិចិន ដែលជាថៅកែ និងជាអ្នកព្យាបាលផ្ទាល់ នៅក្នុងមន្ទីរពេទ្យនេះមិនមានសញ្ញាប័ត្រវេជ្ជបណ្ឌិតនោះទេ ហើយខាងស្ថានទូតក៏ពុំបាន ទទួលស្គាល់គ្រូពេទ្យរូបនោះថាជាវេជ្ជបណ្ឌិតដែរ។
ប្រភពធ្លាប់ប្រាប់ទៀតថា មន្ទីរពេទ្យរស្មីអង្គរនេះ បើកដំណើរការទៅបាន ដោយជួលអោយវេជ្ជបណ្ឌិតជនជាតិខ្មែរដែលចូលនិវត្តន៍ អោយឈរឈ្មោះជំនួសតែប៉ុណ្ណោះ ហើយនៅពេលមានអាសន្នម្តងៗ ទើបហៅលោកវេជ្ជបណ្ឌិតខ្មែរ ដែលឈរឈ្មោះនោះមក ឈរចាំដោះស្រាយដោយអះអាងថា ជាមន្ទីរពេទ្យរបស់ខ្លួន ។កាលពីរសៀលថ្ងៃទី២២ មានគ្រូពេទ្យជនជាតិខ្មែរម្នាក់ ដែលបំរើការនៅមន្ទីរពេទ្យ រស្មីអង្គរ បានប្រាប់ អ្នកយកព័ត៌មានយើង តាមទូរស័ព្ទថា ថ្នាំដែលហួសកាលបរិច្ឆេទខាងលើ គឺនៅកប់តាមក្រឡុកក្រលៀតកៀនកោះ មិនបានយកមកព្យាបាលទេ ព្រោះមន្ទីរពេទ្យធំ មានថ្នាំច្រើន មិនបានពិនិត្យអស់នោះទេ ឯចំណែកសេរ៉ូមដែលថា មិនបានចុះបញ្ជីនោះ គឺបុគ្គលិកធ្វេសប្រហែសមិនបាន បិទតែមនាំចូលគ្រប់ដប ទើបមានសេរ៉ូមខ្លះ អត់មានបិទពន្ធដូច្នេះ។ គ្រូពេទ្យរូបនោះបានបន្ថែមថា ថ្ងៃក្រោយនិងពិនិត្យអោយអស់មិនអោយចន្លោះប្រហោងបែបនេះទៀតទេ។
គួររំលឹកផងដែរថា កាលពីខែ០៥ ឆ្នាំ២០១២ មន្ទីរពេទ្យជីងហ៊ួ (រស្មីអង្គរ) បានចុះចែកថ្នាំគ្រាប់ដល់ប្រជាពលរដ្ឋនៅស្រុកពួក ខេត្តសៀមរាប ដោយខ្វះការប្រុងប្រយ័ត្ន បានធ្វើអោយមនុស្សប្រុសម្នាក់និងមនុស្ស ស្រីវ័យចំណាស់ម្នាក់ស្លាប់បាត់បង់ជីវិត ដោយក្រុមសាច់ញាតិជនរងគ្រោះ បានអះអាងថាការស្លាប់របស់ម្តាយ និងឪពុកពួកគេបណ្តាលមកពី លេបថ្នាំរបស់គ្រូវពេទ្យមកពីគ្លីនិក ជីងហ៊ួ ឬរស្មីអង្គរ ដែលយកមកចែកចាយដោយឥតគិតថ្លៃនេះឯង។
សូមបញ្ជាក់ផងដែរថា បើយោងតាមការស៊ើបអង្កេត មន្ទីរសំរាកព្យាបាលរស្មីអង្គរ ដែលពីមុនឈ្មោះ គ្លីនិកជីងហ៊ួរនេះ តែងតែមានរឿងអាស្រូវ ដោយព្យាបាលបណ្តាលអោយ មនុស្សស្លាប់ជាហូរហែ ព្រោះគ្រូពេទ្យដែលជាថៅកែ និងជាវេជ្ជបណ្ឌិតផ្ទាល់នៅមន្ទីរពេទ្យនេះ មិនមានសញ្ញាប័ត្រត្រឹមត្រូវ ដែលអាចនិយាយបានថា គ្មានចំណេះដឹងពិតប្រាកដ។ប្រភពមួយទៀតបានអោយដឹងថា មូលហេតុដែលមន្ទីរពេទ្យ រស្មីអង្គរ (ពីមុន ជីងហ៊ួរ) នេះអាចឈរជើងបានរហូតដល់សព្វថ្ងៃ បើទោះបីជាមានរឿងអាស្រូវរាប់មិនអស់ក៏ដោយ ក៏ព្រោះតែមន្ទីរពេទ្យនេះ មានអ្នកធំម្នាក់នៅពីក្រោយខ្នង និងមានភាគហ៊ុនរបស់អ្នកធំ ជាមន្រ្តីរាជការម្នាក់នៅខេត្តសៀមរាបនេះទៀតផង។
ពលរដ្ឋដែលដឹងពីរឿងអាស្រូវ របស់មន្ទីរពេទ្យរស្មីអង្គរ សូមអំពាវនាវដល់ប្រជាពលរដ្ឋខ្មែរ ទូទៅមេត្តាកុំទៅប្រថុយប្រថានព្យាបាលជំងឺ នៅមន្ទីរពេទ្យនេះបន្តទៅទៀត ព្រោះអាចបាត់បង់ជីវិត មុនអាយុក៏អាចថាបានដែរ៕
