កំពង់ធំៈ ទោះបីមានការតែងតាំងលោក គុណ ញឹម ជាអគ្គនាយកនៃអគ្គនាយកដ្ឋានគយនិងរដ្ឋាករជំនួសលោក ប៉ែន ស៊ីម៉ន ដែលត្រូវចូលនិវត្តន៍យ៉ាងណាក៏ដោយ ក៏អំពើពុករលួយក្នុងស្ថាប័នគយពុំមានអ្វីថយចុះគួរឲ្យកត់សម្គាល់ទាល់តែសោះ។ ផ្ទុយទៅវិញប្រធានសាខាគយតាមបណ្តាខេត្តមួយចំនួននិងប្រធានស្នាក់ការគយតាមច្រកព្រំដែនជាច្រើនកន្លែងកំពុងប្រើប្រាស់អំណាចនិងតួនាទីដើម្បីស្វែងរកផលប្រយោជន៍ផ្ទាល់ខ្លួនដោយគ្មានញញើតទៅនឹងចំណាត់ការរបស់អង្គភាពប្រឆាំងអំពើពុករលួយឡើយ។ ជាក់ស្តែងលោក សុខ គឹមហេន ប្រធានសាខាគយនិងរដ្ឋាករខេត្តកំពង់ធំ ខេត្តព្រះវិហារកំពុងប្រើប្រាស់តួនាទីប្រព្រឹត្តអំពើពុករលួយបើកដៃឲ្យឈ្មួញដឹកជញ្ជូនទំនិញខុសច្បាប់និងទំនិញគេចពន្ធឆ្លងកាត់ខេត្តទាំងពីរនេះយ៉ាងអនាធិបតេយ្យ។
សេចក្តីរាយការណ៍ពីសមត្ថកិច្ចពាក់ព័ន្ធមួយចំនួនបានឲ្យដឹងថា ចាប់តាំងពីមានការប្រកាសដាក់ឲ្យដំណើរការសាខាគយនិងរដ្ឋាករខេត្តព្រះវិហារកាលពីរសៀលថ្ងៃទី១១ ខែកញ្ញា ឆ្នាំ២០១៤ ដោយមានការតែងតាំងលោក សុខ គឹមហេន ប្រធានសាខាគយនិងរដ្ឋាករខេត្តកំពង់ធំ ឲ្យទទួលមុខងារជាប្រធានសាខាគយខេត្តព្រះវិហារបន្ថែមទៀតនោះ គឺបុគ្គលនេះ កំពុងប្រើប្រាស់អំណាចបំពានច្បាប់យ៉ាងកំរោល។ ប្រភពបានឲ្យដឹងទៀតថា មានបទល្មើសរត់ពន្ធទំនិញគេចពន្ធនិងទំនិញខុសច្បាប់ពីប្រទេសសៀម ចូលតាមច្រកព្រំដែនខេត្តព្រះវិហារ ហើយឆ្លងកាត់ខេត្តកំពង់ធំ យ៉ាងមកចែកចាយក្នុងទីផ្សារនៃប្រទេសកម្ពុជា យ៉ាងគគ្រឹកគគ្រេង។ ទំនិញគេចពន្ធដែលឈ្មួញលួចនាំចូលតាមអំពើចិត្តនោះមានដូចជាម៉ូតូទំនើបៗ គ្រឿងអេឡិចត្រូនិកថ្លៃៗ គ្រឿងសំណង់មាន ស៊ីម៉ងត៍ និងដែក ត្រូវបានដឹកតាមរថយន្តធំៗចេញពីច្រកទ្វារអានសេះ ឆ្ពោះមកខេត្តព្រះវិហារតាមផ្លូវជាតិលេខ៦២ ហើយទំនិញខ្លះចូលមកខេត្តកំពង់ធំ និងខ្លះទៀតឆ្ពោះទៅខេត្តស្ទឹងស្រែង។
សមត្ថកិច្ចពាក់ព័ន្ធបានឲ្យដឹងទៀតថា ក្រុមឈ្មួញរកស៊ីនាំចូលទំនិញខុសច្បាប់និងទំនិញគេចពន្ធភាគច្រើនសុទ្ធតែមានមន្ត្រីជាន់ខ្ពស់មានអំណាចនៅពីក្រោយខ្នង ហើយមានការបើកដៃពីលោក សុខ គឹមហេន ផងដែរ។ ទំនិញគេចពន្ធនិងទំនិញខុសច្បាប់ទាំងនោះមិនដែលឃើញលោក សុខ គឹមហេន ប្រធានសាខាគយខេត្តកំពង់ធំនិងខេត្តព្រះវិហារចាត់វិធានការទប់ស្កាត់ទេ ព្រោះលោក សុខ គឹមហេន គិតតែរឿងផលប្រយោជន៍ផ្ទាល់ខ្លួន។ បញ្ហានេះលោក គុណ ញឹម អគ្គនាយកគយនិងរដ្ឋាករនិងលោក អូន ព័ន្ធមុនី្នរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុត្រូវចាត់វិធានការទប់ស្កាត់ជាបន្ទាន់បំផុត ដើម្បីកុំឲ្យរដ្ឋខាតបង់ចំណូលពន្ធរាប់លានដុល្លារតទៅទៀត៕
