ខេត្តកោះកុងៈ ប្រភពដដែលបានខ្សឹបឲ្យដឹងទៀតថាអស់រយៈជាច្រើនឆ្នាំមកហើយមន្ទីរធនធានទឹកនិងឧតុនិយមខេត្តកោះកុងដែលមានលោក សាញ់ មុន្នីរ័ត្ន ជាប្រធានមន្ទីរនោះគឺពុំសូវមានសកម្មភាពអភិវឌ្ឍនោះទេទោះបីមន្ទីរមួយនេះក្នុងមួយឆ្នាំៗបានចំណាយថវិកាជាតិពីចន្លោះជាង៦០០លានរៀលដល់ជាង៧០០លានរៀល យ៉ាងណាក៏ដោយ ហើយក្នុងនោះ ការចំណាយលើបន្ទុកបុគ្គលិកមានចំនួនមិនដល់៩០លានរៀលផងក្នុងមួយឆ្នាំ ប្រាក់នៅសល់ពីនោះ គឺជាប្រាក់សម្រាប់ចំណាយលើសកម្មភាពការងារ និងការថែទាំជុសជុលទាំងអស់ តែការជុសជុលអស់តិចតួច ប៉ុណ្ណោះ សល់ប៉ុន្មានរត់ចូលហោរប៉ៅលោកប្រធានមន្ទីរតាមរយៈបំប៉ោងឯកសារ។
ប្រភពខ្សឹបឲ្យដឹងទៀតថា បើយើងក្រឡេកមើលខ្ទង់ចំណាយថវិកាជាតិរបស់មន្ទីរធនធានទឹក និងឧតុនិយមខេត្តកោះកុង ក្នុង២០១២-២០១៣និង២០១៤គ្រាន់តែការចំណាយលើថែទាំនិងជុសជុលអគារក្នុងមួយឆ្នាំៗអស់មិនតិចជាង៧០លានរៀលរីឯការចំណាយលើការជុសជួលមធ្យោបាយដឹកជញ្ជូន( រថយន្ត) ក្នុងមួយឆ្នាំៗគេចំណាយអស់ទឹកប្រាក់ចន្លោះពីជាង៣០លានរៀលទៅជាង៥០លានរៀល។សម្រាប់ការចំណាយជាក់ស្ដែងលើផ្នែកថែទាំនិងជុសជុលដោយមន្ទីរមួយនេះ មានអគារល្អស្រាប់។ ប៉ុន្តែថវិកាដែលត្រូវចំណាយថែទាំជុសជុលអស់រាប់សិបលានរៀលសម្រាប់ការចំណាយជាក់ស្ដែងគឺស្ទើរតែគ្មានដោយពេលខ្លះគេគ្រាន់យកថ្នាំលាបតួរអគារបន្តិចបន្តួចអស់ប្រាក់២០ទៅ៣០ម៉ឺនរៀលយ៉ាងច្រើនតែត្រូវលោកប្រធានបំប៉ោងចំណាយដល់ខ្ទង់៧០លានរៀល ។
ហើយ សម្រាប់រថយន្តដែលគេចំណាយសម្រាប់ការថែទាំ និងជុសជួល ក្នុងមួយឆ្នាំៗ រាប់សិបលានរៀលឯនោះ ប្រសិនបើគេយកថវិកាសម្រាប់ជុសជុលក្នុងរយៈពេលមួយឆ្នាំ គឺអាចទិញរថយន្តថ្មីបានមួយគ្រឿង ហើយអ្វីដែលជាក់ស្ដែង រថយន្តរបស់មន្ទីរនេះ តាមដំណឹង គឺក្នុងមួយឆ្នាំគេចំណាយថវិកាជួសជុលពិតប្រាកដអស់ប្រាក់ចន្លោះពី៣ទៅ ៤លានរៀលតែប៉ុណ្ណោះ ។ នេះមិនទាន់និយាយអំពីការចំណាយតាមរបៀបអំពើពុករលួយនៅក្នុងជំពូក៦០ ជំពូក៦២ ជាពិសេសនៅជំពូក៦៥ ដែលក្នុងមួយឆ្នាំៗមន្ទីរមួយនេះ បានចាយថវិកាជំពូក៦៥ អស់ចន្លោះពី៣០០ទៅជាង៣០០លានរៀលផង។
មន្រ្តីដដែលនោះបានខ្សឹបប្រាប់កាសែតបន្ថែមទៀតថា ដោយសារតែមានអំពើពុករលួយដ៏ធំធេងបែបនេះ បានធ្វើឲ្យកំរិតជីវភាពរបស់លោក សាញ់ មុន្នីរ័ត្ន ហក់ឡើងខ្ពង់ខ្ពស់តែក្នុងរយៈពេលដ៏ខ្លី ពោលគឺលើសប្រធានមន្ទីរជាច្រើនទៀត នៅក្នុងខេត្ត។ ហើយមូលហេតុដែលលោក សាញ់ មុន្នីរ័ត្ន អាចប្រព្រឹត្តនូវអំពើពុករលួយនេះបាន គឺដោយមានការចូលរួមគាំទ្រ និងបិទភ្នែកពីលោកប្រធាននាយកដ្ឋានសវនកម្មផ្ទៃក្នុងរបស់ក្រសួងធនធានទឹក ស៊ឹង សុផល (ដែលគេដឹងថា នឹងត្រូវចូលនិវត្តន៍នៅខែឧសភា ខាងមុខនេះ) ហើយនិងអនុប្រធាននាយកដ្ឋានលោក នូ សុបិន ដែលកន្លងមកមន្ត្រីទាំងពីរនេះ តែងតែដឹកនាំគណៈប្រតិភូចុះធ្វើសវនកម្មនូវមន្ទីរធនធានទឹកខេត្តកោះកុង ។ ប៉ុន្តែក្រុមនេះ មិនបានអនុវត្តន៍តាមភារកិច្ចរបស់ខ្លួនក្នុងការត្រួតពិនិត្យការចំណាយចំណុច ខុសចំណុចត្រូវទេ។ ផ្ទុយទៅវិញ គឺពួកគាត់ប្រៀបបាននឹងទៅដើរកម្សាន្ត និងត្រឡប់មកវិញស្ពាយប្រាក់ដែលជាចំណែកដែលលោកប្រធានមន្ទីរ សាញ់ មុន្នីរ័ត្ន ផ្ដល់ជូនប៉ុណ្ណោះ ហើយគេធ្វើរបាយការណ៍ល្អៗពីទីនោះជូនទៅលោករដ្ឋមន្រ្តី ជាការសម្រេច។
ប្រភពបានខ្សឹបបន្តថា មន្រ្តីនៅមន្ទីរនោះមិនហ៊ានតវ៉ាឬប្រឆាំងទៅនឹងការដឹកនាំរបស់ លោកប្រធានមន្ទីរ សាញ់ មុន្នីរ័ត្ន ទេ។ ព្រោះមន្តី្រទាំងនោះ យល់ឃើញថា ក្នុងមន្ទីរមួយនេះមានមន្រ្តីជាអ្នកដឹនាំសរុបតែ៥-៦នាក់មិនអាច បង្កជម្លោះជាមួយគ្នា ខ្លាចមើលមុខគ្នាមិនចំ ជាពិសេស គឺខ្លាចលោកប្រធានមន្ទីរមានការគុំគួនដោះដូរមុខតំណែង ប្រសិនបើការតវ៉ារបស់មន្រ្តីទាំងនោះមិនទទួលបានជោគជ័យ ដូច្នោះមន្រ្តីទាំងនោះ គឺបណ្ដោយឲ្យលោកប្រធានមន្ទីរធ្វើអ្វីក៏ធ្វើទៅ ដោយពួកគាត់សុំតែសុខ ទោះបីលោកប្រធានមន្ទីរមិនសូវផ្ដល់ផលប្រយោជន៍ ដែលគាត់កិបកេងថវិកាជាតិបានមកឲ្យក៏ដោយ។ សារពត៌មានយើងមិនអាចសុំការពន្យល់ពីលោកប្រធានមន្ទីរ សាញ់ មុន្នីរ័ត្នបានទេ ។
