ភ្នំពេញៈថ្លែងនៅក្នុងឱកាសអញ្ជើញចែកសញ្ញាបត្រនិងបើកវគ្គបណ្តុះបណ្តាលដល់កម្មសិក្សាការីមន្រ្តីសាលាភូមិន្ទរដ្ឋបាលកាលពីព្រឹកថ្ងៃទី១០ ខែ មិនាឆ្នាំ ២០១៥ នៅវិឡាស្ថានជាតិអប់រំក្នុងរាជធានីភ្នំពេញសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានរិះគន់យ៉ាងខ្លាំងចំពោះសង្គមស៊ីវិល អង្គការក្រៅរដ្ឋាភិបាលមួយចំនួនដែលបានធ្វើពហិការមិនចូលរួមក្នុងសិក្ខាសាលាពិគ្រោះយោបល់លើសេចក្តីព្រោងច្បាប់ស្តីពីការរៀបចំនិងការប្រព្រឹត្តទៅនៃគណៈកម្មាធិការជាតិរៀបចំបោះឆ្នោតនិងច្បាប់ស្តីពីការបោះឆ្នោតជ្រើសតាំងតំណាងរាស្រ្តដោយសម្តេចបានលើកឡើងថាព្រោះតែលង់ទៅនិងជំងឺតួឯកទើបអង្គការក្រៅរដ្ឋាភិបាលមួយចំនួននោះបានធ្វើពហិការ។
ជាមួយគ្នានោះដែរសម្តេចតេជោហ៊ុនសែនក៏បានក្រើនរំលឹកដល់មន្រ្តីរាជការស៊ីវិលទាំងអស់ត្រូវយកគំរូតាមវិរៈភាពមន្រ្តីរាជការជាកងកំលាំងប្រដាប់អាវុធដោយត្រូវធ្វើជាខ្ញុំបម្រើដ៏ស្មោះត្រង់របស់ប្រជាពលរដ្ឋមិនមែនធ្វើជាចៅហ្វាយនោះឡើយ។
ដោយឡែកក្នុងឱកាសនោះដែរសម្តេចហ៊ុនសែនក៏បានធ្វើការដាស់តឿនក្រើនរំលឹកដល់មន្រ្តីរាជការស៊ីវិលដែលមានជិត១៩ម៉ីននាក់ថា កុំធ្វើជាមន្រ្តីជើង១០ ហើយមន្រ្តីដែលតាំងខ្លួនជាចៅហ្វាយរបស់ប្រជាពលរដ្ឋមិនមែនជាអ្នកបំរើដ៏ស្មោះត្រង់របស់ប្រជាពលរដ្ឋទេសុទ្ធតែជាទម្លាប់ខុសឆ្គង។
សម្តេចតេជោនាយករដ្ឋមន្រ្តីហ៊ុនសែន បានមានប្រសាសន៏ថា អ្វីចង់ផ្តាំផ្ញើដំបូងបំផុត គឺចង់និយាយថា ការធ្វើមន្រ្តីយើងកុំភ្លេចឲ្យសោះថា គឺជាខ្ញុំបំរើដ៏ស្មោះត្រង់របស់ប្រជាជនមិនមែនជាចៅហ្វាយរបស់ប្រជាជនទេ។ ចំណុចនេះគឺត្រូវយល់អំពីសារជាតិពិតប្រាកដនៃមន្រ្តីបើមិនដូចេ្នះទេមន្រ្តីរបស់យើងនិងពើងទ្រូងដាក់ប្រជាជនហើយតាំងខ្លួនជាចៅហ្វាយរបស់ប្រជាជន ។ ចំណុចនេះជាពិសេសទាមទាឲ្យមន្រ្តីរបស់យើងរំលឹកដាស់តឿនខ្លួនឯងជាប់ជានិច្ច។ ទរង្វីខុសឆ្គងណាមួយដែលតាំងខ្លួនជាចៅហ្វាយរបស់ប្រជាពលរដ្ឋហើយមិនមែនជាខ្ញុំបម្រើដ៏ស្មោះត្រង់របស់ប្រជាជនគឺសុទ្ធតែចំណុចខុសជាមួយនិងកិច្ចការដែលត្រូវបម្រើដល់ប្រជាជន។
យើងមានឧទាហរណ៏ស្រាប់ដូចជាកងកំលាំងប្រដាប់អាវុធគឺពួកគេបានបំពេញកាតព្វកិច្ចក្នុងឋានៈដែលផ្តល់ឲ្យយើងនូវឧទាហណ៏ដែរថា ជាអ្នកការពារ ជាអ្នកបម្រើដល់ប្រជាពលរដ្ឋ។ ចំណុចនេះយើងបានឃើញជាហូរហែនៅពេលដែលយើងទាំងឡាយកំពុងគេងលង់លក់ស្កល់ក្រោមតំណក់ទឹកភ្លៀងយ៉ាងខ្លាំងនៅក្នុងផ្ទះ។ ប៉ុន្តែកំលាំងប្រដាប់អាវុធរបស់យើងទាំងកងទ័ពនិងនគរបាលទាំងអាវុធហត្ថគ្នានៅឈរកណ្តាលភ្លៀងអ្នកដែលមានងអាវភ្លៀងគឺពាក់អាវភ្លៀងឈរយាមដើម្បីសុវត្ថិភាពរបស់យើងទាំងអស់គ្នានិងរបស់សង្គមជាតិ។ នៅតាមព្រំដែនត្រូវឈរ ជូនកាលដើរល្បាតក្រោមតំណក់ទឹកភ្លៀង រងា ក្តៅ គ្រប់រសជាតិទាំងអស់ កងកំលាំងប្រដាប់អាវុធរបស់យើងបានបង្ហាញពីវីរភាពសំរាប់មន្រ្តីរាជការស៊ីវិលក៏ដូចជាសម្រាប់អ្នកដៃទៀត ដែលទាក់ទងទៅនិងបម្រើចំពោះប្រជាពលរដ្ឋ។
សម្តេចតេជោ ហ៊ុន សែន មានប្រសាន៏ទៀតថា បើសិនជាអស់លោកអ្នកទាំងឡាយយល់ឃើញថា កម្លាំងប្រដាប់អាវុធជាឧទាហរណ៏មួយក្នុងចំណោមឧទារហណ៏នៃការពារនិងបម្រើប្រជាពលរដ្ឋ សំរាប់យើងជាមន្រ្តីរាជការដែលទៅអង្គុយទៅលើកៅអី មានកៅអី មានតុ ត្រូវខិតខំចៀសវាងឲ្យខាងតែបាន នូវមន្រ្តីដែលហៅថា មន្រ្តីជើង១០ ដែលជើង ៤ គឺជើងតុ ហើយជើងកៅអី៤ វាប្រាំបី ជើង យើង២ទៀត វា ដប់។ អញ្ចឹងកុំឲ្យខ្លួនក្លាយជាមន្រ្តីជើង១០ ដែលចុងបំផុត លុះត្រាតែមិនចេះរត់រកការងារធ្វើទេ ឲ្យការងាររត់មករកយើងវិញ។ អញ្ចឹងមន្រ្តីធុននេះមិនមែនជាមន្រ្តីដែលមានអនាគត់ទេ។ យើងត្រូវបណ្តុះគំនិតឲ្យបាន ឥរិយាបលចំពោះប្រជាពលរដ្ឋ។
ពាក្យចាស់ លោកថា មិនខុសទេ ងើយស្កក ឱនដាក់គ្រាប់។ ការឱនលំទោន ការដាក់ខ្លួន មិនមែនជាការចុះចាញ់រឺភាពឡេមឡឹមទេប៉ុន្តែបើមានបញ្ហាអាកាប់មែកជាន់ធាងនោះក៏ត្រូវតែប្រយ័ត្នដែរ។ ជាមួយមុខអ្នកធំ គឺសុភាពណាស់ ប៉ុន្តែចេញពីផុតពីអ្នកធំ ទៅប៉ះអ្នកតូច អាហ្នឹងគឺថា ពើងទ្រូងយកតែម្តង។ មួយទៀតមន្ត្រីដែលមិនបានការ មន្រ្តីដែលឥតប្រយោជន៏ទទួលតែអាត្រូវទេ អាខុសមិនដែលចេះទទូលទេ បើអាត្រូវដណ្តើមយកខ្ទើច បើអាខុស ទម្លាក់ឲ្យអ្នកដទៃ ទាំងអស់។ អញ្ចឹងចំណុចនេះជាចំណុចដែលខ្ញុំគ្រាន់តែដើម្បីដាស់តឿនមន្រ្តីរបស់យើងក្នុងមុខងារណាក៏ដោយ តួនាទីថ្នាក់ណាក៏ដោយ ត្រូវមានការទទួលខុសនិងត្រូវទៅជាមួយគ្នា។ បើមិនដូចេ្នះគុណសម្បត្តិយើងជាអ្នកទទួល គុណវិបត្តិធ្លាក់ទៅអ្នកដទៃ។
