ខេត្ដសៀមរាប ៖ មេព្រៃបាគងឈ្មោះ វ៉េង លី ត្រូវបានគេសង្ស័យថា នៅពីក្រោយនៃការដឹកជញ្ជូនឈើល្មើសច្បាប់ របស់មេឈ្មួញជើងខ្លាំងម្នាក់ឈ្មោះ ហេង ហុង ដើម្បីទទួលបានលាភសក្ករាៈចូលហោប៉ៅរបស់ខ្លួន ។
បើតាមប្រភពព័ត៌មានច្បាស់ការ បានអោយដឹងថា មេឈ្មួញដឹកឈើដុះស្លែ ឈ្មោះ ហេង ហុង រូបនេះ បានរកស៊ីដឹកឈើរាប់សឹបឆ្នាំកន្លងមកហើយ មកពីតំបន់ប៉ែកខាងលើនៃស្រុកស្វាយលើ ឆ្លងការស្រុកស្វាយលើនិងស្រុកសូទ្រនិគមតាមរយៈគោយន្ដកន្ដ្រៃ និងរឺម៉កម៉ូតូ យកស្ដុកទុកនៅភូមិកន្ទ្រាំង ឃុំកន្ទ្រាំងស្រុកប្រាសាទបាគង ហើយបន្ដដឹកជញ្ជូនយកផ្ញើទុកនៅដេប៉ូឈើ ឈ្មោះ ចែសន ស្ថិតនៅភូមិជ្រៃ ឃុំកណ្ដែកស្រុកប្រាសាទបាគងខេត្ដសៀមរាប តាមបណ្ដោយផ្លូវជាតិលេខ៦ខាងកើតវត្ដស្វាយធំ ប្រហែល១០០ម៉ែត្រ។ប្រភពដដែលបានបន្ដថា ក្រោយពីក្រុមឈ្មួញដឹកឈើមកផ្ញើទុកនៅដេប៉ូឈើខាងលើ គេបានជួលរម៉កម៉ូតូខ្នាតធំ ដឹកជញ្ជូនមកលក់ចែកចាយតាមដេប៉ូឈើនានានៅកណ្ដាលក្រុងសៀមរាប យ៉ាងរលួន ដោយមានការឃុបឃិតគ្នា ជាមួយម្ចាស់ដេប៉ូឈើខាងលើ លក់វិក័យបត្រដេប៉ូក្នុងមួយសន្លឹកតម្លៃ១០ដុល្លា ដើម្បីដឹកឈើតាមរម៉កម៉ូតូ ចូលក្នុងសៀមរាប បន្លំភ្នែកសមត្ថកិច្ចនានា និងប្រែក្លាយឈើល្មើសច្បាប់ អោយក្លាយទៅជាឈើចេញពីដេប៉ូស្របច្បាប់ទៅវិញ។ ប្រភពដដែល បានបញ្ជាក់ទៀតថា ទោះបីពួកគេដឹកឈើចេញពីទីតាំងមួយទៅទីតាំងមួយ ច្រើនកន្លែងបែបនេះក្ដីក៍ម្ចាស់រ៉ឺម៉កម៉ូតូបាននិយាយថា គេបានប្រាប់ ឬបង់លុយអោយសមត្ថកិច្ចមេព្រៃបាគង ឈ្មោះវ៉េងលី និងផ្នែករដ្ឋបាលព្រៃឈើ រួចរាល់ហើយទើបហ៊ានដឹកចេញ។
ទាក់ទិននឹងការដឹកជញ្ជូនល្មើសច្បាប់ខាងលើនេះ អ្នកកាសែត បានសាកសួរ លោកវ៉េង លី មេព្រៃបាគង ប៉ុន្ដែ លោក វ៉េង លី បានអោយដឹងថា លោកមិនអាចចាត់វិធានការបានទេ ព្រោះមេឈ្មួញឈើ ឈ្មោះ ហេង ហុង បានបង់លុយអោយរូបគាត់រួចរាល់អស់ហើយ។បន្ទាប់មក លោក វ៉េង លី បានឲ្យសួរ លោក ឡឹង សុខា ដែលជាមន្ដ្រីផ្នែក រដ្ឋបាលព្រៃឈើបន្ទាយស្រី ដែលទទួលបន្ទុករួម បទល្មើសព្រៃឈើ នៅក្នុងសៀមរាប ។ក៍ប៉ុន្ដែលោក ឡឹង សុខា បានអោយដឹងថា ពួកអ្នកដឹកឈើ ប៉ែកខាងលើមិនបានប្រាប់គាត់នោះទេ ។
គួររំលឹកផងដែរថា ទោះបីជាមេព្រៃបាគង រុញដាក់គ្នានិងបដិសេធយ៉ាងនេះក្ដី ក៍មេឈ្មួញដុះស្លែឈ្មោះ ហេង ហុង និងរឺម៉កម៉ូតូបានអះអាងថា គេមិនខ្លាចក្នុងការដឹកជញ្ជូនឈើ ទាំងយប់ទាំងថ្ងៃ ដោយគេបានបង់លុយជូន មេព្រៃខាងលើយ៉ាងគាប់ចិត្ដ រួចរាល់អស់ហើយ ៕
