លោក ខឹម វិចិត្រា ក្នុងតួនាទីជាប្រធាននគរបាលអន្តោប្រវេសន៍ប្រចាំច្រកព្រំដែនទ្វេភាគីជ្រៃធំ-ខ្នារតាំងយូ កំពុង ប្រមូលលុយយកទៅច្រកហោប៉ៅធ្វើមានធ្វើបានផ្ទាល់ខ្លួន ជាពិសេសទុកបែងចែកលោកស្នងការរងទទួលផែន ទើបគេមិនដែលឃើញថ្នាក់លើឮមាត់ឮកពីភាពអសកម្មរបស់លោក ខឹម វិចិត្រា ទាល់តែសោះទើបអ្វីៗនៅតែដដែលគ្មានការកែទម្រង់។
ប្រជាពលរដ្ឋបានរាយការណ៍ថាចាប់តាំងពីលោក ខឹម វិចិត្រា បានឡើងកាន់តំណែងជាប្រធាននគរបាលអន្តោប្រវេសន៍ប្រចាំច្រកជ្រៃធំ គេសង្កេតឃើញមន្ត្រីនគរបាលជាច្រើនប្រចាំច្រកនេះ មានឱកាសប្រព្រឹត្តអំពើពុករលួយឃុបឃិតឲ្យក្រុមឈ្មួញរកស៊ីដឹកជញ្ជូនទំនិញគេចពន្ធមកពីស្រុកយួនយ៉ាងអនាធិបតេយ្យហើយគេដឹងថាទំនិញភាគច្រើនជាប្រភេទគ្រឿងសំណង់ និងជាទំនិញខុសច្បាប់ដូចជាត្រីឆ្តោ ត្រីរ៉ស មេស្រា ថ្នាំពុល ដែលមានការបង់ពន្ធមិនដល់១០ភាគរយផងទេ ដូច្នេះជាឱកាសដែលលោក ខឹម វិចិត្រា ចាត់តាំងមន្ត្រីក្រោមឱវាទរបស់គាត់ឲ្យប្រមូលលុយពីការនាំចូលទំនិញគេចពន្ធ យកទៅច្រកហោប៉ៅធ្វើមានធ្វើបានយ៉ាងសុខស្រួលបំផុត។
សម្រាប់ក្រុមឈ្មួញនាំចេញសត្វព្រៃនិងឈើខុសច្បាប់ពីស្រុកកោះធំ ចេញទៅស្រុកយួនជាប់ជាប្រចាំនិងមានភាពគគ្រឹកគគ្រេងមិនចាញ់យុទ្ធនាការឃោសនារកសំឡេងឆ្នោត សុទ្ធតែជាប្រភពចំណូលរបស់លោក ខឹម វិចិត្រា។
ប្រជាពលរដ្ឋក៏បានលើកឡើងផងដែរថា មន្ត្រីក្រោមឱវាទរបស់លោកខឹម វិចិត្រា បានកោស រូសបង្ខំឲ្យប្រជាពលរដ្ឋដែលឆ្លងដែនចេញទៅស្រុកយួន ឲ្យបង់លុយទៅតាមការទាមទាររបស់ពួកគេ គឺក្នុងម្នាក់ៗចំនួន២ម៉ឺនទៅ៣ម៉ឺនរៀល ដោយគ្មានការយោគយល់ថា ប្រជាពលរដ្ឋត្រូវឆ្លងដែនទៅពិនិត្យព្យាបាលជំងឺ ឬទិញឥវ៉ាន់បន្តិចបន្តួចនោះទេ។ ក្នុងមួយថ្ងៃៗគេសង្កេតឃើញពលរដ្ឋខ្មែរដែលបានធ្វើដំណើរឆ្លងកាត់ព្រំដែនជ្រៃធំ-ខ្នារតាំងយូ មានប្រមាណ៥រយទៅ១ពាន់នាក់ដែលយកទៅគុណជាមួយ ប្រាក់២ម៉ឺនរៀល ដែលអ្នកដំណើរម្នាក់ត្រូវបង់ឲ្យមន្ត្រីនគរបាលអន្តោប្រវេសន៍ពុករលុយឃើញថាប្រភពចំណូលរបស់លោក ខឹម វិចិត្រាមិនធម្មតាទេ គឺមានខ្ទង់លាន រៀលឯណោះ ក្នុងមួយថ្ងៃៗ។
ដោយឡែក សម្រាប់ជនជាតិយួនដែលឆ្លងដែនចូលមកលេងល្បែងស៊ីសងនៅតាមកាស៊ីណូ ឬសង្វៀនបញ្ជល់មាន់នៅក្នុងស្រុកស្អាង និងស្រុកកោះធំ មួយថ្ងៃៗប្រមាណ ៣០០ទៅ៥០០នាក់ គឺអាចឆ្លងដែនចូលមកប្រទេសកម្ពុជាដោយមិនចាំបាច់ត្រួតពិនិត្យលិខិតស្នាមអ្វីទាំងអស់ ដោយគ្រាន់តែបង់លុយជូននគរ បាលអន្តោប្រវេសន៍របស់លោក ខឹម វិចិត្រា ចំនួន៤ម៉ឺនរៀល។ មានការបញ្ជាក់ផងដែរថា លោក ខឹម វិចិត្រា អាចមានឱកាសអភិ វឌ្ឍន៍មុខតំណែងនិងជីវភាព គ្រួ សារបានយ៉ាងឆាប់រហ័សដោយ សារតែគាត់មានជំនាញកាប់ដាវ និងមានឱកាសឃុបឃិតឲ្យក្រុមឈ្មួញរកស៊ីដឹកជញ្ជូនទំនិញគេចពន្ធ និងទំនិញខុសច្បាប់ឆ្លងកាត់ព្រំដែនដោយគ្មានក្រែងអ្វីទាំងអស់ ធ្វើយ៉ាងណាឲ្យតែគាត់អាចប្រមូលលុយច្រកហោប៉ៅ៕
