ប្រជាពលរដ្ឋបានរៀបរាប់ថា ល្បែងកន្ទុយលេខ និងភ្នាល់បាល់ទាត់ដែលកំពុងកើតមានយ៉ាងអនាធិបតេយ្យពេញតំបន់ប៉ោយប៉ែតគឺជាប្រភពចំ ណូលមិនចេះរីងស្ងួតរបស់សមត្ថកិច្ចនគរបាលនិងកងរាជអាវុធ រួមទាំងអាជ្ញាធរក្រុងប៉ោយប៉ែត ទើបអ្វីៗអាចដំណើរការដោយរលូនល្អគ្មានការបង្ក្រាបម្តងណាឡើយ ហើយមេបនល្បែងស៊ីសងជាច្រើន បានអួតអាងជាចំហរថា ពួកគេបង់លុយឲ្យសមត្ថកិច្ចនិងមន្ត្រីពាក់ព័ន្ធសព្វគ្រប់អស់ហើយ គ្មាននរណាហ៊ានប៉ះ ពាល់ការបើកល្បែងស៊ីសងខុសច្បាប់របស់ពួកគេទេ។
មានអំពើល្មើសជាច្រើនទៀត ដែលកំពុងកើតមាននៅលើទឹកដីក្រុងប៉ោយប៉ែត ហើយគេអាចវាយតម្លៃបានថា បទល្មើសទាំងនេះកើតចេញពីភាពអសកម្ម នៃបនល្បែងស៊ីសងខុសច្បាប់ដែលកំពុងកើតមានយ៉ាងអនាធិបតេយ្យនៅលើទឹកដីក្រុងប៉ោយប៉ែតដូចដែលប្រជាពលរដ្ឋមួយចំនួនបានអះអាងថា ជនដែលចាញ់ល្បែងស៊ីសងមួយចំនួនបន្ទាប់ពីបំផ្លាញទ្រព្យសម្បត្តិក្នុងផ្ទះក៏បែកគំនិតចេញធ្វើសកម្មភាពលួចប្លន់នាំឲ្យមានអសន្តិសុខក្នុងសង្គម បំផ្លាញភាពសុខសាន្តរបស់ប្រជារាស្ត្រខ្មែរទូទៅ។
ប្រជាពលរដ្ឋនៅក្រុងប៉ោយប៉ែត បានបង្ហើបឲ្យដឹងថា មេកន្ទុយលេខដែលធំជាងគេនៅលើទឹកដីក្រុងប៉ោយប៉ែតនាពេលបច្ចុប្បន្ននេះ មានចំនួន៣នាក់ គឺ១.ឈ្មោះ ស្តើង សុផល ២.ឈ្មោះ លោកប្រុស ៣.លោក សំហេង ហើយមេកន្ទុយលេខទាំង៣នាក់នេះ បានបែងចែកតំបន់គ្នាសម្រាប់រកស៊ី។ មានការបញ្ជាក់ផងដែរថា លោក ស្តើង សុផល បានដាក់ពង្រាយកូនកញ្ច្រែង របស់ពួកគេឲ្យចាំប្រមូលប្រជាពលរដ្ឋដែលញៀនល្បែងកន្ទុយលេខនៅចំណុចភូមិបាលិលេយ្យ២ សង្កាត់ប៉ោយប៉ែត ចំណែកលោកប្រុស និងលោក សំ ហេង ពួកគេបាននិយាយត្រូវរ៉ូវគ្នាគ្រប់គ្រងអ្នកញៀនល្បែងកន្ទុយលេខនៅចំណុចភូមិក្បាលកោះ និងភូមិក្បាលស្ពាន។ នៅតាមតំបន់ភូមិសាស្ត្រដែលមេកន្ទុយលេខទាំង៣នាក់នេះគ្រប់គ្រងគេបានដាក់ពង្រាយកូនកញ្ច្រែង ហើយអ្នកកត់កន្ទុយលេខរាយរងមួយចំនួនដែលមិនបានឡើងឲ្យពួកគេ ច្បាស់ជាត្រូវរំខានតាមរយៈការប្តឹងឲ្យសមត្ថកិច្ចចុះទៅបង្ក្រាបរំខានការរកស៊ីកត់កន្ទុយលេខ។
កន្លងមកសមត្ថកិច្ចក្រុងប៉ោយប៉ែត ធ្លាប់បានបង្ក្រាបមេកត់កន្ទុយលេខរាយរងមួយចំនួន ដើម្បីប្រមូលឲ្យទៅចូលរួមឡើងឲ្យមេធំៗទាំង៣នាក់ខាងលើនេះ ងាយស្រួលពួកគេកេណ្ឌប្រមូលឲ្យចូលបង់លុយ ហើយរហូតមកដល់ពេលនេះមេកន្ទុយលេខទាំង៣នាក់ បានសែនព្រេនបង់លុយឲ្យនគរបាលកងរាជអាវុធហត្ថនិងអាជ្ញាធរក្រុងប៉ោយប៉ែតទៅតាមការចរចាគ្នាជារៀងរាល់ខែ ទើបមិនដែលឃើញមានការបង្ក្រាបទីតាំងភ្នាល់បាល់ទាត់ និងកត់កន្ទុយលេខដោយខុសច្បាប់។
លោក សំ ហេង គឺជាមេកន្ទុយលេខដ៏ធំជាងគេ ហើយប្រកបអាជីពនេះឡើងដុះស្លែទៅហើយ ព្រោះមេនគរបាល និងមេកងរាជអាវុធហត្ថនៅក្រុងប៉ោយប៉ែត សុទ្ធសឹងជាមិត្តភក្តិរបស់លោក សំ ហេង ដូច្នេះគេតែងតែមានការយោគយល់គ្នាមិនសូវកោសរូសបង្ខំឲ្យបង់លុយនោះទេ ហើយបើទោះបីជាមានតួនាទីជាមន្ត្រីសុរិយោដីក៏ពិតមែន គេមិនបានឃើញលោក សំ ហេង ចូលប៊ុយរ៉ូធ្វើការងារនោះទេ គឺគាត់គ្រាន់តែយកតួនាទីជាមន្ត្រីសុរិយោដី ទៅប្រកបអាជីពជាមេឈ្មួញបើកទីតាំងកត់កន្ទុយលេខយ៉ាងអនាធិបតេយ្យបំផុត។
