កំពត៖ ដើម្បីបិទបាំងភ្នែកនាយករដ្ឋមន្រ្តី នៃព្រះរាជាណាចក្រកម្ពុជា ដែលគ្រោង អញ្ជើញចុះទៅសម្ពោធដាក់ឲ្យប្រើប្រាស់នៅថ្ងៃទី២៩ ខែមិថុនា ឆ្នាំ២០១៥ខាងមុខនេះ កំណាត់ផ្លូវជាតិលេខ៣៣ពីចំណុចផ្លូវបំបែកភូមិតាអេងដល់ព្រំប្រទល់កំពត-កែប ប្រវែងប្រមាណ១២គី ឡូម៉ែត្របន្ទាប់ពីការសាងសង់បានរយៈពេលប្រមាណ១០ខែ ឥឡូវនេះបាននិងកំពុងរងការខូចខាតទៅវិញ យ៉ាងខ្លាំង។ ឥឡូវក្រុមហ៊ុនកំពុង សម្រុកជួសជុលឡើងវិញទាំងយប់ទាំងថ្ងៃហើយពលរដ្ឋកំពុងតែរិះគន់យ៉ាងចាស់ដៃតែម្តង។
ប្រជាពលរដ្ឋនិងមន្រ្តីសាលាខេត្តកំពតបានឲ្យដឹងថា កំណាត់ផ្លូវជាតិលេខ៣៣ ត្រូវបានដេញថ្លៃ សាងសង់ដោយក្រុមហ៊ុនកូរ៉េឈ្មោះ «KOK DONG» តែក្រុមហ៊ុនមួយនេះ បានផ្ទេរគម្រោងទៅឲ្យក្រុមហ៊ុន របស់លោក លឹម សំបូរ ប្រធានមន្ទីរសាធារណការ និងដឹកជញ្ជូនខេត្តកំពត ជាអ្នកសាងសង់បន្តទៅវិញ។
កំណាត់ផ្លូវជាតិលេខ៣៣នេះមិនបានរងការខូចខាតទាំងអស់នោះទេ គឺខូចខាតដោយកន្លែងៗ។ កន្លែងដែល ខូចខាតខ្លាំងស្ថិតនៅត្រង់ម្តុំចំការសាវម៉ៅ ស្ថិតក្នុងភូមិកំពង់កេះ ឃុំត្រពាំងសង្កែ ស្រុកទឹកឈូ ខេត្តកំពត។
ប៉ុន្តែអ្វីដែលជាការសោកស្តាយកំណាត់ផ្លូវជាតិមួយនេះ សាងសង់មិនទាន់បានមួយឆ្នាំផង បែររងការខូចខាតខ្ទេចខ្ទាំទៅ វិញហើយ ទាំងមិនទាន់បានបើកសម្ពោធដាក់ឲ្យប្រើប្រាស់ផង។ ការខូចខាតនេះ ត្រូវបានគេអះអាងថា មិនមែន បណ្តាលមកពីការដឹកលើសទម្ងន់អ្វីនោះទេ ព្រោះកំណាត់ផ្លូវនេះ មិនសូវមានរថយន្តដឹកទំនិញល្មើសច្បាប់ឆ្លង កាត់នោះទេ។
ប្រជាពលរដ្ឋបានលើកឡើងថា កំណាត់ផ្លូវជាតិលេខ៣៣ លោក លឹម សំបូរ ជាអ្នកទទួលធ្វើ បន្តពីក្រុមហ៊ុនកូរ៉េ បានកិបកេង ធ្វើមិនគោរពតាមស្តង់ដារនោះទេ ជាហេតុធ្វើឲ្យផ្លូវឆាប់ខូចបែបនេះហើយ កំណាត់ផ្លូវនេះ បានធ្វើឲ្យលោក លឹម សំបូរ ចំណេញប្រាក់កប់ក្តោង។ប៉ុន្តែផ្ទុយទៅវិញដល់ពេលជិតនាយករដ្ឋមន្រ្តីមកសម្ពោធនោះបែរជានាំគ្នាសម្រុកធ្វើទៅវិញដែលជាហេតុនាំឲ្យមានការរិៈគន់យ៉ាងចាស់ដៃពីពលរដ្ឋនិងមជ្ឍដ្ឋានទូទៅ។
បើតាមគម្រោងនៅព្រឹកថ្ងៃទី២៩ ខែមិថុនា ឆ្នាំ២០១៥នេះលោក ហ៊ុន សែន នឹងអញ្ជើញទៅស្រុក កំពង់ត្រាច ខេត្តកំពត ដើម្បីសម្ភោធដាក់ឲ្យប្រើប្រាស់ជាផ្លូវការនូវផ្លូវជាតិលេខ៣៣, ផ្លូវជាតិលេខ៣១ និងអគារ ថ្មី របស់អង្គភាពនគរបាលអន្តោប្រវេសន៍ច្រកទ្វារព្រំដែនអន្តរជាតិព្រែកចាក។ដើម្បីជាការបិទបាំងការពិតពីនាយករដ្ឋមន្រ្តីនោះ លោក លឹម សំបូរ កំពុងតែញាប់ដៃញាប់ជើងជួសជុលផ្លូវ ដែលរងការខូចខតខាងលើនេះ៕
