កំពងឆ្នាំងៈ ថ្មីៗនេះមានសេចក្តីរាយការណ៍ពីប្រជាពលរដ្ឋរស់នៅភូមិស្លតខ្នង ឃុំផ្លូវទូក ស្រុកកំពង់លែង ខេត្តកំពង់ឆ្នាំង បានឱ្យដឹងថា មានមន្ត្រីបរិស្ថានដែលមានស្នាក់ការនៅភូមិស្លតខ្នង ឃុំផ្លូវទូក ដៃម្ខាងបង្ក្រាបបទល្មើសដៃម្ខាងទៀត បង្កើតបទល្មើសយ៉ាងពេញបន្ទុកតែម្តងដោយពុំខ្លាចច្បាប់ប្រឆាំងអំពើពុករលួយនោះទេ ។
តំបន់ព្រៃ់ឈើលិចទឹកជាជម្រកសត្វស្លាប និងជាជម្រកត្រីពងកូនជាច្រើនកន្លែងបានរងនៅការកាប់ដុតបំផ្លាញ យកដីជាកម្មសិទ្ធិពីជនខិលខូចមួយចំនួនមានលុយមានអំណាចកំពុងនាំគ្នាកាប់ទន្ទ្រានយកដីប្រឆាំងទៅនឹងបទបញ្ជារបស់រាជរដ្ឋាភិបាលសម្តេចតេជោ ហ៊ុន សែន យ៉ាងពេញបន្ទុកក្នុងឃុំផ្លូវទូក ស្រុកកំពង់លែង ខេត្តកំពង់ឆ្នាំង ដែលមិនគួរលោក ឈួរ ច័ន្ទឌឿន អសមត្ថភាពជាមួយ និងក្រុមបរិស្ថាន និងជលផលនោះទេ ! ។
គេធ្លាប់ចាំបានថា សម្តេចតេជោ ហ៊ុន សែន បានព្រមានខ្លាំងៗនៅពេលកន្លងមក ពាក់ព័ន្ធទៅនឹងព្រៃលិចទឹកបញ្ជាឱ្យ អាជ្ញាធរពាក់ព័ន្ធ ជាពិសេសលោកអភិបាលខេត្តនៅជុំវិញបឹងទន្លេសាបធ្វើយ៉ាងណាទប់ស្កាត់បទល្មើស នេសាទ, បទល្មើសការ កាប់ទន្ទ្រានយកដីព្រៃលិចទឹកជាកម្មសិទ្ធផ្ទាល់ខ្លួននោះឱ្យបាន ។ តែមកទល់ពេលនេះ បែរជាកើតមានដដែល ។
ដូចជា កន្លងមកអាជ្ញាធរបឹងទន្លេសាបបានកំណត់ព្រំដីហាមឃាត់ ដែលហៅថា តំបន់១, តំបន់២ និងតំបន់៣ ទៀត ផង ។ ហើយកត្តាទាំងនេះគឺជាមូលហេតុដាក់វិធានការទប់ស្កាត់ឱ្យមានប្រសិទ្ធភាពនោះ ។ ប៉ុន្តែផ្ទុយទៅវិញ មិនត្រូវបាន អាជ្ញាធរពាក់ព័ន្ធថ្នាក់ខេត្តអនុវត្តនោះទេ គេសង្កេតឃើញបទល្មើសកាប់ព្រៃឈើលិចទឹក យកដីនៅតែបន្តរហូតមកដល់សព្វ ថ្ងៃ ហាក់មានកំណើនកើនជាលំដាប់ ក្នុងនោះក៏មានមន្ត្រីជំនាញខ្លះៗបានចូលរួមប្រព្រឹត្តបទល្មើសនេសាទ បទល្មើសកាប់ព្រៃ លិចទឹកយកដីជាកម្មសិទ្ធិខ្លួនឯងទៀតដែលមិនគួរគេមើលរំលងនោះទេ ។
ភាពមិនប្រក្រតីនេះប្រជាពលរដ្ឋបានបន្តទៀតថា ពួកគាត់រកស៊ីនេសាទជាលក្ខណៈគ្រួសារតែងតែរងទុកបុកម្នេញ ពីមន្ត្រីជំនាញ តែបើមន្ត្រីជំនាញប្រព្រឹត្តល្មើសច្បាប់វិញ គ្មាននរណាដាក់ទោសនោះទេ ? ។
ជាក់ស្តែងដូចលោកប្រធានស្នាក់ការបរិស្ថាន ប្រចាំភូមិស្លតខ្នង ឃុំផ្លូវទូក បង្កើតឱ្យបទល្មើសនេសាទប្រភេទឆក់ត្រី ឱ្យប្រជាពលរដ្ឋជាច្រើននាក់ ទៅឆក់ត្រីរួចយក ត្រីមកលក់ឱ្យប្រពន្ធរបស់ខ្លួន ជាមេឈ្មួញទិញត្រីដ៏ធំប្រចាំឃុំផ្លូវទូក ។ ហើយ បើប្រជាពលរដ្ឋប្រកបមុខរបរឆក់ត្រីណាមិន យកត្រីមកលក់ឱ្យប្រពន្ធលោកប្រធានស្នាក់ការបរិស្ថានទេ គាត់នឹងចាប់ដាក់ទោសហើយស្រួលមិនស្រួលបញ្ចូនទៅ តុលាការជាប់គុកជាប់ច្រវ៉ាក់ជាក់ជាមិនខានឡើយ ។
តាមប្រភពបន្តទៀតថា បើទោះបីក្រុមអ្នករកស៊ីនេសាទឆក់ត្រីបានយកត្រីមកលក់ឱ្យប្រពន្ធគាត់យ៉ាងណាក៏ ដោយ ក៏នៅតែបង់លុយក្បាលទូកឱ្យលោកប្រធានស្នាក់ការបរិស្ថានដដែល គេចផុតនោះទេ ? ក្រុមអ្នករកស៊ីឆក់ត្រី ដែលជាជំនិតរបស់លោកប្រធានស្នាក់ការបរិស្ថានឃុំផ្លូវទូកមានដូចជា ឈ្មោះ អួន, ឈ្មោះ អ៊ន, ឈ្មោះ មាប់, ឈ្មោះ ឡាយ ៘ បានកំពុងតែមោទនភាពចេញមុខអួតអាងពីមានសិទ្ធិអំណាចក្នុងការចុះកាប់ព្រៃលិចទឹក និងធ្វើបទល្មើសនេសាទយ៉ាង ពេញបន្ទុក ហើយដែលមិនគួរអាជ្ញាធរក្រសួងដែនដីពាក់ព័ន្ធមើលរំលងនោះទេ ។
ជាងនេះទៅទៀតប្រភពបានឱ្យដឹងទៀតថា លោកប្រធានស្នាក់ការបរិស្ថានឃុំផ្លូវទូកនេះ បានប្រព្រឹត្តបទល្មើសកាប់ ដុតទន្ទ្រាន ព្រៃឈើលិចទឹកជាជម្រកសត្វស្លាប និងជម្រកត្រីពងកូន ស្ថិតក្នុងតំបន់ហាមឃាត់ជ្រកក្រោមតួនាទី ដោយជួល ឈ្នួលកាប់ជាបន្តបន្ទាប់ជាយូរឆ្នាំមកហើយ ។ ដូចជា កន្លែងខ្លះបានដាំល្ងជារៀងរាល់ឆ្នាំកន្លែងខ្លះទៀតទើបតែកាប់ទេ។ ហើយលោកប្រធានស្នាក់ការបរិស្ថានហ៊ានប្រព្រឹត្តបែបនេះ ត្រូវបានគេលួចសរសើរថា គាត់អង់អាចខ្លាំងណាស់ហ៊ាន ប្រឆាំង ទៅនឹងបទបញ្ជារបស់សម្តេចតេជោ ហ៊ុន សែន ដោយត្រង់ៗគ្មាន ញញើតបន្តិចណាឡើយ ។
ពាក់ព័ន្ធនឹងករណីខាងលើនេះ អ្នកសារព័ត៌មានយើងមិនអាចទាក់ទងលោក ពៅ ប៊ុនថន ប្រធានមន្ទីរបរិស្ថានខេត្តកំពង់ឆ្នាំង បានទេដោយពុំមានលេខទូរសព្ទ័ ។
សូមបញ្ជាក់ថា មួយរយៈមកនេះពេលមាននេះរឿងអាស្រូវជាច្រើនកើតចេញពីមន្ត្រីបរិស្ថានដែលឈរជើងតាមស្នាក់ ការ ក្រោមការចាត់តាំងពីលោក ពៅ ប៊ុនថន ជាប្រធានមន្ទីរបរិស្ថានខេត្តកំពង់ឆ្នាំង ដែលកើតចេញមកពីភាពធូររលុង ឬក៏ លោកប្រធានមន្ទីរបានទទួលលាភសក្ការៈជាប្រចាំពីកូនចៅក៏អាចថា បានទើបរាល់កាប់បំផ្លាញព្រៃលិចទឹក ចេះតែកើតយ៉ាង ទ្រង់ទ្រាយធំក្រោមការគ្រប់គ្រងរបស់គាត់ ដូចជាពាក្យរិះគន់ថា “ទីណាកើតមានមន្ត្រី ទីនោះខ្ទេចខ្ទីព្រៃលិចទឹកអស់”។
ពាក់ព័ន្ធនឹងករណីនេះ ក្រុមប្រជាពលរដ្ឋក៏បានសំណូមពរដល់លោក សាយ សំអាល់ រដ្ឋមន្ត្រីក្រសួងបរិស្ថាន គួរតែដាក់ ក្រុមអធិការកិច្ចក្រសួង ធ្វើការស៊ើបអង្កេតជាបន្ទាន់ផង ដើម្បីយកជនល្មើសទៅផ្តន្ទាទោសហើយ ជាពិសេសគួរតែលោកទេស រដ្ឋមន្ត្រី ឱម យ៉ិនទៀង ដែលជាប្រធានអង្គភាពប្រឆាំងអំពើពុករលួយនោះ ដាក់ការស្រាវជ្រាវចាប់ជន ដែលពាក់ព័ន្ធក្នុង ករណីខាងលើមកផ្តន្ទាទោសទៅតាមច្បាប់ផង ដើម្បីទប់ស្កាត់ឬជាការព្រមានកុំឱ្យបុគ្គលដទៃប្រព្រឹត្តតាមតទៅ។
