ម៉ូតូគេចពន្ធពីប្រទេសវៀតណាម ត្រូវបានគេលួចនាំចូលមកកម្ពុជា យ៉ាងអនាធិបតេយ្យ នៅស្រុកស្វាយទាប ខេត្តស្វាយរៀង។ ពលរដ្ឋនៅនេះអះអាងថា យ៉ាងហោចណាស់ក្នុងមួយថ្ងៃមានមនុស្សជិះម៉ូតូគេចពន្ធឆ្លងកាត់ខេត្តនេះ យកទៅលក់នៅតាមបណ្ដាខេត្តផ្សេងៗ មានចំនួនពី ៣០ ទៅ ៤០គ្រឿងដែរ។
អ្នកភូមិនៅខេត្តស្វាយរៀង បានរៀបរាប់ថា ម៉ូតូដែលគេបានលួចនាំចូលគេចពន្ធទាំងនោះ ភាគច្រើនជាប្រភេទម៉ូតូម៉ាក វ៉េវ (Wave) សាលូត (Salut) ឆ្លាម (Chlam) និងម៉ាក អ៊ែ.អែស.អ៊ិច (RSX) របស់ក្រុមហ៊ុនហុងដា (HONDA) និង យ៉ាម៉ាហា (YAMAHA) ផលិតនៅប្រទេសវៀតណាម។ ម៉ូតូទាំងនោះត្រូវបានគេលួចនាំចូលតាមច្រករបៀងនានានៅស្រុកចន្ទ្រា រួចគេយកមកលាក់ទុកនៅស្រុកស្វាយទាប រកឱកាសល្អដើម្បីបញ្ជូនចេញទៅតាមបណ្ដាខេត្តមួយចំនួនក្នុងប្រទេសកម្ពុជា។
ប្រជាពលរដ្ឋអ្នកឃើញសកម្មភាពរត់ពន្ធម៉ូតូសុំមិនបញ្ចេញឈ្មោះម្នាក់ រស់នៅភូមិអំពៅព្រៃ ឃុំធ្លក ស្រុកស្វាយជ្រំ ខេត្តស្វាយរៀង មានប្រសាសន៍នៅថ្ងៃទី១៥ តុលា ថា ក្រុមអាជីវករនាំម៉ូតូគេចពន្ធ ភាគច្រើនមានទីតាំងនៅផ្ដុំផ្សារប្រសូត្រ ក្នុងស្រុកស្វាយទាប រួចជួលអ្នកភូមិជិះរំលៀងតាមផ្លូវជាតិលេខ១ តម្រង់ទៅខេត្តស្វាយរៀង រួចបត់ឆ្លងកាត់តាមស្រុករមាសហែក ឆ្ពោះទៅខេត្តកំពង់ចាម។
ពលរដ្ឋមិនបញ្ចេញឈ្មោះ៖ «ធ្លាប់នៅជិតខាងហ្នឹងដែលមកសាកសួរគាត់ក្នុងម៉ូតូមួយតម្លៃ ៣ម៉ឺនរៀល ហ្នឹងកាត់សោហ៊ុយចាយវាយស្អីទាំងអស់ គឺលើថៅកែជាអ្នកចេញ។ ៣ម៉ឺនរៀលហ្នឹងរត់ពីស្វាយរៀងយើងហ្នឹង ទៅដល់ខេត្តកំពង់ចាម គេទៅប្រហែល ៣ ទៅ ៤ម៉ោងទៅដល់ហើយ។ មួយថ្ងៃបើគេរត់ខំគេអាចបានពីរជើង បើគេរត់មិនខំទេបានមួយជើង។ គេជិះតាមម៉ូតូមួយម្នាក់ទៅនាំគ្នាជិះទៅ ជួនកាលមួយខ្សែមាន ៥គ្រឿង ៦គ្រឿង ឬមាន ១គ្រឿង ២គ្រឿង អ៊ីចឹងជាបន្តបន្ទាប់»។
ចំណែកឯប្រជាពលរដ្ឋម្នាក់ទៀតរស់នៅស្រុកស្វាយទាប ឲ្យដឹងស្រដៀងគ្នានេះដែរថា តម្លៃម៉ូតូនាំចូលគេចពន្ធពីវៀតណាម ក្នុងមួយគ្រឿងពី ៤០០ ទៅ ៨០០ដុល្លារ ហើយតម្លៃម៉ូតូទាំងនោះទាបខ្ពស់ទៅតាមសេរីរបស់ម៉ូតូ៖ «គេមានផ្ទះ មានម៉ូយរបស់គេនៅស្មរ ដូចថាខ្ញុំនៅកណ្ដៀងរាយ អ៊ីចេះមានម៉ូតូចោលតាមច្រកហ្នឹងមកគេ មានគេទិញទុក គេមានម៉ូយរបស់វា យួនវាយកពីស្រុកយួនហ្នឹងមក គេយកមកលក់ឲ្យខ្មែរផ្ទះហ្នឹងទៅ។ យើងខ្មែរមានម៉ូយអ៊ីចឹងទៅ ដូចថាមានម៉ូយនៅប្រសូត នៅស្វាយរៀង នៅជីភូ ដល់ហើយគេតេប្រាប់ម៉ូយគេថា មានម៉ូតូ នេះ ២គ្រឿង ៣គ្រឿង ទើបតែឡើងមកព្រឹកមិញ ហើយត្រូវការគេទិញ គេនិយាយភិនភាគថា ម៉ូតូនៅស្អាតនៅអី រួចគេឲ្យកូនចៅគេឡើងទៅយក»។
លោកបន្តថា អ្នកជិះម៉ូតូគេចពន្ធរត់ទៅតាមបណ្ដាខេត្ត គេច្រើនធ្វើសកម្មភាពចន្លោះពីម៉ោង ៤ទៀបភ្លឺ រហូតដល់ម៉ោងប្រមាណ ៨ព្រឹក គេជិះតម្រៀបបន្តកន្ទុយគ្នាដូចហែកឋិន។ លោកថា សកម្មភាពនេះអាចដំណើរការទៅបានអ្នកជិះម៉ូតូត្រូវបង់ប្រាក់ក្នុងដំណើរឆ្លងកាត់ផ្លូវទៅឲ្យអាជ្ញាធរប៉ូលិស កន្លែងខ្លះ ២ពាន់ ទៅ ៤ពាន់រៀល ក្នុងម៉ូតូមួយគ្រឿង។
អ្នកយកព័ត៌មានយើង នៅពុំទាន់អាចទាក់ទងប៉ូលិសច្រកព្រំដែននៅស្រុកចន្ទ្រា និងមន្ត្រីគយខេត្តស្វាយរៀង ដើម្បីបកស្រាយបំភ្លឺជុំវិញបញ្ហានេះបានទេនៅថ្ងៃទី១៥ តុលា។ ប៉ុន្តែអធិការស្រុកស្វាយទាប លោក ដាំ ឃា ថ្លែងថា អាជ្ញាធរប៉ូលិសពុំទាន់ទទួលបានដំណឹងជុំវិញការរត់ម៉ូតូគេចពន្ធមកស្តុកទុកនៅស្រុកស្វាយទាប នៅឡើយ៖ «អត់មានផង ចាំមើលខ្ញុំស្រាវជ្រាវឲ្យណាស់!»។
សកម្មភាពលួចនាំម៉ូតូពីប្រទេសវៀតណាម គេចពន្ធចូលកម្ពុជា ក្នុងមួយថ្ងៃមានប្រមាណពី ៣០ទៅ ៤០គ្រឿង។ សកម្មភាពនេះបានកើតឡើងតាំងពីមុនបោះឆ្នោតសភាតំណាងរាស្ត្រនីតិកាលទី៥មកម្ល៉េះ។ ប៉ុន្តែតែអាជ្ញាធរមានសមត្ថកិច្ចមិនបានអើពើ បណ្ដោយឲ្យឈ្មួញឱកាសនិយមធ្វើសកម្មភាពរបស់ខ្លួនបានជាបន្តបន្ទាប់។ បញ្ហានេះបង្កឲ្យមានការបាត់បង់ដល់ចំណូលថវិកាជាតិជាច្រើនម៉ឺនដុល្លារ។ ដូចនេះអាជ្ញាធរមានសមត្ថកិច្ចដែលមានការពាក់ព័ន្ធនឹងបញ្ហានេះ ធ្វើយ៉ាងណាទប់ស្កាត់ការពារសកម្មភាពលួចនាំម៉ូតូគេចពន្ធកុំឲ្យមានសកម្មភាពបន្តទៅមុខទៀត៕
