អ្នកនាំពាក្យគណបក្សសង្គ្រោះជាតិ លោកយឹម សុវណ្ណ បានបញ្ជាក់ច្បាស់ៗកាលពីថ្ងៃម្សិលមិញថា គណបក្សសង្គ្រោះជាតិ នឹងធ្វើមហាបាតុកម្ម នៅរាជធានីភ្នំពេញ ចាប់ពីថ្ងៃទី២៣តុលាតទៅដោយគ្មានកាលកំណត់រហូតដល់មានដំណោះស្រាយ។
តែជាជំហានដំបូងគណបក្សប្រឆាំងនេះនឹងធ្វើរយៈពេលបីថ្ងៃជាប់គ្នាជាមុនសិន ពោលគឺ នៅថ្ងៃទី២៣ ២៤ និង២៥ តុលាខាងមុខនេះ។
ប៉ុន្តែ រហូតមកដល់ពេលនេះ សាលារាជធានីភ្នំពេញ មិនទាន់ទទួលបានលិខិតស្នើរសុំធ្វើមហាបាតុកម្មពីគណបក្សសង្គ្រោះជាតិនៅឡើយទេ។ នេះបើតាមការបញ្ជាក់ឲ្យដឹងពីលោកឡូង ឌីម៉ង់ អ្នកនាំពាក្យសាលារាជធានីភ្នំពេញ។
លោកឡុង ឌីម៉ង់បន្តថា រាល់ស្ថាប័ន រឺគណបក្សនយោបាយណា មានគម្រោងធ្វើមហាបាតុកម្ម គឺត្រូវតែគោរពឲ្យបានត្រឹមត្រូវតាមច្បាប់បាតុកម្ម បើមិនគោរពតាមទេនោះស្ថាប័ន និងគណបក្សនយោបាយទាំងអស់នោះនឹងត្រូវមានវិធានការទប់ស្កាត់ និងត្រូវទទួលខុសត្រូវតាមផ្លូវច្បាប់។
