រាជធានីភ្នំពេញ៖ បន្ទាប់ពីលោកចម ប្រសិទ្ធ អតីតរដ្ឋមន្ត្រីក្រសួងពាណិជ្ជកម្មហើយបច្ចុប្បន្នជារដ្ឋមន្ត្រីក្រសួង ឧស្សាហកម្មរ៉ែនិងថាមពល បានធ្វើបទសម្ភាសន៍មួយជាមួយកាសែតដ៏ល្បីនៅ កម្ពុជា ដែលក្នុងបទសម្ភាសន៍នោះលោកចម ប្រសិទ្ធ បានអះអាងថាគាត់ នឹងធ្វើកំណែទម្រង់ដ៏ស៊ីជម្រៅនិងជំរុញឲ្យតម្លាភាព ក្នុងក្រសួងថ្មីនេះហើយធ្វើឲ្យវិស័យឧស្សាហកម្មនៅកម្ពុជា មានការអភិវឌ្ឍន៍ នោះរួចមកមន្ត្រីរាជការទាំងអស់ក្នុងក្រសួងឧស្សាហកម្មបាននាំគ្នា រិះគន់យ៉ាងចាស់ដៃចំពោះរដ្ឋមន្ត្រីថ្មីនេះ ខណៈដែលពួកគេបាន និយាយថាលោក ចម ប្រសិទ្ធ មានឈ្មោះ “ស្អុយរលួយ” ជាសាធារណៈក្នុងក្រសួងពាណិជ្ជកម្មតើមានសមត្ថភាពនិងឥទ្ធិពលអ្វីមក អួតអាងមុនអំពីស្នាដៃនៅក្រសួងឧស្សាហកម្មរ៉ែ និងថាមពលនោះ ។
មន្ត្រីរាជការក្រសួងឧស្សាហកម្មរ៉ែនិងថាមពលសុទ្ធតែបានអះអាងដូចៗ គ្នាថាក្រសួងមួយនេះប្រហែលជាជួបបញ្ហាអកុសលបន្តទៀតនៅពេលដែលក្រសួង ដែលជារដ្ឋមន្ត្រីមានឈ្មោះមិនសូវល្អ ។ ពួកគាត់លើកឡើងថាពត៌មានច្រើនណាស់ដែលធ្លាយចេញពីក្រសួងពាណិជ្ជកម្ម អំឡុងពេលលោកចម ប្រសិទ្ធ នៅកាន់អំណាចទីនោះ ។ អ្នកណាក៏ដឹងដែរថាក្រសួងពាណិជ្ជកម្មពេលនោះពោពេញដោយអំពើពុករលួយ អំណាចនិយមបក្សពួកនិយមគ្រួសារនិយមផ្តាច់មុខរហូតប្រែក្លាយក្រសួងមួយ នេះជាក្រសួងគ្រួសារ របស់លោករដ្ឋមន្ត្រីចម ប្រសិទ្ធ អស់រយៈពេលច្រើនអាណត្តិ ។
មន្ត្រីរាជការបានបញ្ជាក់ថាក្លិនស្អុយអាសោចច្រាស់ខ្យល់របស់ក្រសួង មួយនេះ បានធ្វើឲ្យមន្ត្រីរាជការបុគ្គលិក កម្មករ នៅទីនោះស្ទើរទ្រាំរស់នៅមិនបាន ហើយមានពេលខ្លះចង់ផ្ទុះបដិវត្តផ្តួលរំលំលោក ចម ប្រសិទ្ធ ទៅហើយ ។ ប៉ុន្តែកំហឹងឈឺចាប់របស់មន្ត្រីរាជការបុគ្គលិកកម្មករមិនអាចឲ្យ ពួកគេធ្វើអ្វីផ្តេសផ្តាសបាន ព្រោះតែសង្គមមានអ្នកគ្រប់គ្រងមានច្បាប់ទម្លាប់ រួមទាំងក្រមសីលធម៌ ។
ពួកគាត់បានអះអាងថាព្រោះតែមន្ត្រីរាជការបុគ្គលិកកម្មករនៅទីនោះមាន កំហឹងឈឺចាប់នោះហើយ ទើបការបោះឆ្នោតជ្រើសរើសតំណាងរាស្ត្រកន្លងមកនេះពួកគេទាំងអស់គ្នា បានបង្ខំចិត្តនិងសម្រេចចិត្តមិនបោះឆ្នោតឲ្យគណបក្សកាន់អំណាច បើទោះជាមនសិកាពួកគេ នៅគោរពស្រឡាញ់ សម្ដេច ហ៊ុន សែន ក៏ដោយចុះ ។ មានន័យថាពួកគេមានកំហឹងឈឺចាប់ចំពោះការដឹកនាំបែបគ្រួសារនិយម ផ្តាច់ការនិយមរបស់លោកចម ប្រសិទ្ធ ទើបពួកគេមិនបោះឆ្នោតជូន សម្ដេច ហ៊ុន សែន ។
មន្ត្រីរាជការក្រសួងឧស្សាហកម្មរ៉ែនិងថាមពលបាន បន្តថាទោះជាលោកចម ប្រសិទ្ធ យកដៃទាំងពីរ ឬដៃក្រុមគ្រួសារលោកមកបិទបាំងព្រះអាទិត្យក៏វាមិនជិតដែរ ព្រោះសាធា រណៈជនទូទៅគេដឹងអំពីចរិកដឹកនាំ របស់លោកអស់ទៅហើយ ។ ដូច្នេះមន្ត្រីរាជការក្រសួងឧស្សាហកម្មរ៉ែ និងថាមពលប្រហែលជា មិនមានជំនឿលើការដឹកនាំឬការអះអាងតែមាត់ របស់លោក ចម ប្រសិទ្ធ នោះទេ ។
ម្យ៉ាងទៀតពួកគេប្រហែលជាត្រូវរងនូវការដឹកនាំបែបគ្រួសារនិយមបក្សពួកនិយម បន្ទាប់ពីក្រសួងពាណិជ្ជកម្មនៅពេលដែលគ្រប់គ្នាបានមើលឃើញថាប្រសិនបើ លោក ចម ប្រសិទ្ធ គ្រាន់បើ ឬមានមនសិកាដូចការអះអាងតាមកាសែតនោះប្រហែលជាលោកត្រូវអនុវត្តឲ្យ បានល្អត្រឹមត្រូវនៅក្រសួងពាណិជ្ជកម្មបាត់ទៅហើយ ហើយមិនទុកឲ្យក្រសួងពាណិជ្ជកម្មផ្ទុកក្លិនស្អុយរលួយ រហូតសម្តេចនាយករដ្ឋមន្ត្រី ហ៊ុន សែន សម្រេចចិត្តដកលោកចេញរដ្ឋមន្ត្រីក្រសួងពាណិជ្ជកម្ម នោះទេ ៕
