ខេត្តកណ្តាល៖បើតាមសេចក្តីរាយការណ៍ពីខេត្តកណ្តាលបានឲ្យដឹងថា បច្ចុប្បន្ននេះនៅចំណុចព្រែកស្បូវ ក្នុងឃុំសំពៅពូន ស្រុកកោះធំ ខេត្តកណ្តាល មានឈ្មួញជាច្រើនកំពុងសម្រុកនាំចូលមាន់ ទា និងជ្រូកក្រហមពីប្រទេសវៀតណាម ហើយដឹកជញ្ជូនតាមផ្លូវជាតិលេខ២១បេ យ៉ាងអនាធិបតេយ្យមកលក់ចែកចាយដល់រាជធានីភ្នំពេញ គឺមិនដែលរំខានដល់មន្ត្រីជំនាញនិងសមត្ថកិច្ចពាក់ព័ន្ធនោះទេ។ ភាពអនាធិបតេយ្យនៃការដឹកជញ្ជូនមាន់ ទា ជ្រូកក្រហម ឆ្លងកាត់ស្រុកចំនួន៣ នៃខេត្តកណ្តាលនេះ ធ្វើឡើងទាំងយប់ទាំងថ្ងៃ គ្មានក្រែងញញើតចំពោះបទបញ្ជារបស់រាជរដ្ឋាភិបាលនោះទេ ព្រោះក្រុមឈ្មួញទាំងនោះបានត្រូវដៃត្រូវជើងជាមួយមន្ត្រីជំនាញនិងសមត្ថកិច្ចពាក់ព័ន្ធដោយមានការបង់លុយថ្លៃក្បាលឡាននិងបង់លុយប្រចាំខែមិនដែលមានផលរមាស់អ្វីឡើយ។
ការនាំចូលនិងដឹកជញ្ជូនមាន់កសិកម្ម ទា ស៊ុត និងត្រី ជាពិសេសជ្រូកក្រហមរបស់ក្រុមឈ្មួញទាំងតូចទាំងធំ តាមច្រកជ្រៃធំ នៃស្រុកកោះធំនៃខេត្តកណ្តាលឡើងមកតាមផ្លូវជាតិ២១បេ យកមកចែកចាយក្នុងខេត្តកណ្តាល និងរាជធានីភ្នំពេញ មានភាពគគ្រឹកគគ្រេងខ្លាំងឡើងៗហើយមន្ត្រីជំនាញពេទ្យសត្វខេត្តកណ្តាលក៏ដូចជាសមត្ថកិច្ចពាក់ព័ន្ធដែលប្រចាំការតាមដងផ្លូវច្រើនស្អេកស្កះសុទ្ធតែទទួលបានផលប្រយោជន៍ ពីការនាំចូលមាន់ ទា និងជ្រូកក្រហមពីប្រទេសវៀតណាមផ្ទុយពីបទបញ្ជារបស់សម្តេចតេជោសែន នៃរាជរដ្ឋាភិបាលកម្ពុជា៕
មន្ត្រីដែលទទួលបានផលប្រយោជន៍ច្រើនជាងគេ ពីការឃុបឃិតឲ្យក្រុមឈ្មួញនាំចូលមាន់ ទា និងជ្រូកក្រហម តាមចំណុចព្រែកស្បូវ នៃស្រុកកោះធំយ៉ាងអនាធិបតេយ្យនោះ គឺលោក លឹម ងួនគ្រុយ ជាអនុប្រធានមន្ទីរកសិកម្មខេត្តកណ្តាល និងលោក ពួច ជាប្រធានក្រុមបង្ក្រាបការដឹកជញ្ជូនសត្វ និងជាប្រធានកុងត្រូលជជុះរបស់ពេទ្យសត្វ។ មានការបញ្ជាក់ផងដែរថា លោក ពួច មានដាក់ពង្រាយមន្ត្រីរបស់គាត់នៅតាមប៉ុស្តិ៍ជជុះដែលប្រចាំការតាមផ្លូវជាតិលេខ២១បេ លេខ២ លេខ៣ លេខ១ និងលេខ១១០ អង្គុយចាំរាប់ក្បាលឡានដឹកមាន់ ទា ជ្រូកក្រហម យ៉ាងអនាធិបតេយ្យបំផុត។
សូមបញ្ជាក់ផងដែរថា មានឈ្មួញជាច្រើនដែលរកស៊ីដឹកជញ្ជូន មាន់ទា និងជ្រូកក្រហម មកពីប្រទេសវៀតណាម តាមច្រកជ្រៃធំ ដូចជា១.ឈ្មោះ ធឿន ២.ឈ្មោះ អឿន និង៣.ឈ្មោះ វណ្ណា ហើយការដឹកជញ្ជូនមាន់ ទា ជ្រូក ក្រហម ទាំងនោះប្រើប្រាស់រថយន្តកូរ៉េ។
មន្ត្រីតូចតាចមួយចំនួនបានបង្ហើបឲ្យដឹងថាក្រុមឈ្មួញរកស៊ីដឹកជញ្ជូនជ្រូក មាន់ ទា ជ្រូកក្រហម តាមចំណុចព្រែកស្បូវនិងច្រកជ្រៃធំ គឺកើតមានច្រើនខែមកហើយ គេមិនដែលឃើញអាជ្ញាធរនិងសមត្ថកិច្ចពាក់ព័ន្ធហ៊ានចេញមុខទៅទប់ស្កាត់ ឬបង្ក្រាបក្រុមឈ្មួញទាំងនោះម្តងណាឡើយ ហើយមន្ត្រីនិងសមត្ថកិច្ចពាក់ព័ន្ធចេះតែសុខស្រួលក្នុងការឃុបឃិតឲ្យក្រុមឈ្មួញរកស៊ីនាំចូលមាន់ ទា ជ្រូកក្រហម យ៉ាងអនាធិបតេយ្យ ដោយមិនខ្វល់ខ្វាយពីបទបញ្ជារបស់រដ្ឋាភិបាលសូម្បីតែបន្តិច។ លោកអភិបាលខេត្តកណ្តាល ឡើងថ្មី ត្រូវតែចាត់វិធានការក្តៅជាបន្ទាន់ដើម្បីបង្ការបង្ក្រាបនិងទប់ស្កាត់ការដឹកជញ្ជូន មាន់ ទា និងជ្រូកក្រហមដែលកំពុងកើតមានយ៉ាងគគ្រឹកគគ្រេងក្នុងភូមិសាស្ត្រខេត្តកណ្តាល៕
